وحدة *** بقلم صبري علي

**وحدة ..

قلت هتيجى - كتير - ولا جيت ..
لسّة فاكرنى , ولّا نسيت .?
قلت هتفضل عمرك جنبى ..
نسيت - م الوحدة - انّ اناحبّيت .!
قلت لى : "غمّض عينك, واحلم" ..
حلمت بصحبة, وأهل , وبيت ..
وامّا لقيت ' الحلم بيبعد ..
جيت على نفسى , واستنّيت .
قلت انّك محتاج لحنانى ..
ليه محسّتش انّك حنّيت .?
وكنت باخبّى هناي ف قلبك .!
عدّى العمر , ولا اتهنّيت .
ياما وصفت ' الحلوة عيونى ..
وقلت عليها كتير , وحكيت .
وانّها بحر, وشطّ, ومرسى ..
وأجمل حضن, وأحسن بيت .!
وانّ سكوتى معاك ' أحلام ..
وانّ كلامى معاك حواديت .!
وانّ هواى ' بيجرى ف دمّك ..
مهما سافرت, ورحت, وجيت .
قلت هتسأل ' بكرة علية ..
فات اليوم كلّه ' ما رنّيت .!
قلت: "ضرورى يكون مشغول" ..
ولّا" يكون تعبان " فبكيت ..
وامّا غلبنى الشّوق رنّيت لك ..
وامّا مردّتش ' اتخضّيت .
خدت الشّوق, والهنا, والفرحة ..
وعلى مكانّنا الآثر ' جيت .

• لقيتها ' قاعدة معاك' فى مكانى ..

إيديها ف إيديك'م الصدمة جريت .!
رجعت بحيرة, وحرقة, ولوعة ..
وقلت: "ياريتنى ف يوم ما هويت"

صبري على