- تاهت ملامحنا
- بين الألم والدمع والأحزان
- سكن العذاب ريحنا
- صبح العذاب سجّان
- والشمس خايفة تنور
- والقمر سرحان
- الكل تايه فى وطنى
- كل الوطن تعبان
- اللى بيشكى المواجع
- واللى بيبكى وراجع
- ومجمعانا المضاجع
- بالحزن والحرمان
- يا ضحكة قومى وتعالى
- مين يرحمك يا حالى
- سهران بناجى الليالى
- أصبح فى يوم إنسان
- فين الضمير يا وطن
- اصرخ يا عم الزمن
- أمتى تعدى المحن ؟
- ونعيش فى خير وأمان
- مكتوب علينا الآسى
- يا شعب خيره اتنسى
- وهمــــومه متأسسة
- ممنوع يعيش فرحان
- علّوا التمن يــــــا ولد
- واتحكمــــوا فى البلد
- واللى يثور ينجــــلد
- ممنوع يعيش غلبان
- والباشا عايش براحته
- ياكل ويشرب فى خيرى
- وفى لحظة قمت وصارحته
- الجـــلدة كانت مصيرى
- أسف يا باشا سامحنى
- ولدى فى بيتى فاضحنى
- من جوعه والله جارحنى
- كاره أكــــــــون غلبان
- كل أما أصبّر فى ولدى
- ألقى همومك يا بلدى
- زادت وهدت فى سندى
- ويا رتنى م الأعيان
- اوعاك تقول إنى ظالم
- زادت فى أيـدى المظالم
- يا رب أنت اللى عالم
- كان نفسى أعيش إنسان
- الشاعر / ناصر عبد المقصود
شاعرة
الاثنين، 2 يناير 2017
تاهت ملامحنا *** بقلم الشاعر ناصر عبد المقصود
الاشتراك في:
تعليقات الرسالة (Atom)
ليست هناك تعليقات:
إرسال تعليق