ربك لما يفرجها ....احمد شاهين

رَبَّك لَمَّا يِفْرِجْهَا
ــــــــــــــــــــــــــــ
دَه رَبَّك لَمَّا يِفْرِجْهَا
بِتِتعَدِّل وِتِبْقَى تَمَام
مِن وِسْطِ الضِّيقَه يِخْرِجْهَا
وِتِتبَدِّل وَلاَ الأحْلاَم
تِلاَقِي اللِّيل طِلِعْلُه صَبَاح
وِنِسْمِة صِيف مَع الأفْرَاح
تِلاَقِي قُلُوبْنَا غَاويَه سَمَاح
وِنِتْصَافَى مَع الأيَّام
وِتِهْرَب مِنِّنَا الأحْزَان
وِنِتْلاَقَى مَع الأحْضَان
وِتِبْقَى الضِّحْكَه بِالألْوَان
فَتِهْرَب مِنِّنَا الأوْهَام
وِتِبْقَى حَياتْنَا مِ السُّكَّر
لإنْ عُقُولْنَا بِتْنَوَّر
مَادَام فِي الأرْض بِنْعَمَّر
هَتِبْقَى حَقِيقَه مُش أحْلاَم
بِالحُب نِعْلاَ وِنْعَلِّي
ألاَقِي صَاحْبِي وِفي ضِلِّي
يَا صُحْبَه جَمِيلَه بِتْحَلِّي
وِبِتْخَلِّي مَا بِينَّا سَلاَم
دَه رَبَّك لَمَّا يِفْرِجْهَا
بِتِتعَدِّل وِتِبْقَى تَمَام
مِن وِسْطِ الضِّيقَه يِخْرِجْهَا
وِتِتبَدِّل وَلاَ الأحْلاَم
ــــــــــــــــــــــــــــــــــــــــــ
كلمات الشاعر أحمد شاهين
----- مصر - أسيوط -----