الحب البعيد*** بقلم الشاعر تامر النقيب

• الحب البعيد
• بقلم تامر النقيب
• __________________
• (١)
• العُمر فات والشَعر شاب
• وأنا لسه منك بستحي
• لمسة إديك نظرة عنيك
• جواها بيتي ومطرحي
• ______________
• (٢)
• أنا لسه شايفك بالضفاير
• ع الترعه وف غيط الجيران
• والزلعه بتغني فى إديكي
• مليانه شهد وخير زمان
• نفس المكان
• على وشى بيبان الخجل
• وبغمزه من ضحكه عنيكي
• أنا كان يكون عندى امل
• انا كنت هَعمِلك عَمَل
• انا كنت اخاف
• يطلع على ليلي النهار
• والقاكي في دار الجيران
• انا كنت بجمع ضحكتك
• وازرعها في وسط الغيطان
• تطلع سنابل من امل
• واقطفها انا ورد وريحان
• والله لو يرجع زمان
• بس الزمان خلى العجز
• في الوش بان
• _____________
• (١)
• متقولش عن قلبك كده
• انا رغم منك بستحي
• انا عاشقه من صغري هواك
• وحياة نبينا المصطفى
• وكمان مقام السيدة
• علشان هواك ومحبتك
• كدت العدا
• أنا كل حته ف جتتي
• منقوشة من لمسه ايديك
• وزهور شبابي كلها
• مين قدها
• مروية من حبك وبيك
• أنا نَفسي ليك
• انا كل حاجه عشقتها
• موجوده فيك
• _______________
• (٢)
• انا نفسي ينعاد الزمان
• وارجع أغازل طرحتك
• والشال كمان
• واستني في المولد بتاع سيدنا الولي
• وأجيبلك الريحه اللي كا نت فللي
• منديل بؤيا مطرزه حبه حنان
• ياااااااااه ع الزمان
• اتغيرت ريحه البيوت
• حتى الشوارع والحواري والسكوت
• والحب بقى شئ مختلف
• بقى زي شئ
• م الركنه بقى فيه العطب
• أصبح عجب
• حتى الحبايب كلهم
• يبيعوا بعض بدون سبب
• يا أيها الحب الذي
• أصبح مايعرفش التعب
• بقى حب من اجل الفلوس
• أو لجل حبه من دهب
• بقى ساقيه بتلف لورا
• بقي سيرك وف ساحه أتنصب
• بقى كل كل الحب كدب
• _______________
• (١) ، (٢)
• علم حبايبك كلهم معنى الوفا
• خلي يدخل دنيتك
• يجهل بها كلمة جفا
• علمهم العهد اللي كان
• والضل والدار والامان
• هو انت ليه سيبت قلوب الطيبين ؟
• وبقيت حزين
• يا أيها الحب البعيد
• ارجع لهم دول محتاجين
• والنَّاس قلوبها اتغيرت
• جفت كما عجاف السنين
• يا أيها الحب البعيد
• طب إنت فين ؟
• ترجع قلوبهم كلهم
• بقى شكلهم وكأنهم
• والله دول ناس ميتين
• _________________
• كتبها تامر النقيب
• ٣/٧/٢٠١٧
•