- حَمْلتْ بِي لِيّام
- وَ تْوَحْمَت بِيّا
- بَ وْحَمْ صْعِيبْ
- --
- تْشَهّاتْ بِيّا عْذَاب
- تْشَهّاتْ بِيّا هْمُومْ
- وَ شْحَالْ تشَهّاتْ
- مَنْ جِيبْ وْ جِيبْ
- --
- قَوْتَتْنِي مَنْ سُرّة
- شْرابْهَا فِيهْ مْرُورَة
- وَ طْعَامْهَا فِيهْ حرُورَة
- مَدْهُونْ بَحْلاوَة ازْبِيبْ
- --
- وَ نْهَارْ بْغَيْت نْزيد
- كِيفْ اتْرَبْيَة ... كِيفْ لَوْلِيدْ
- حَلّيت الْبَابْ ... طَلّيتْ
- لْكَيت النّاس شَادّة انْدِيبْ
- --
- وْ بَاشْ اتْفَكْ الرّوحْ
- مَنْ الرُّوحْ
- لاحَتْنِي جْنِي مَطْرُوحْ
- زْيَادَة بْلا رُوحْ
- دْحَاتْني كِيفْ ارْبِيبْ
- --
- وْ حِيتَ كَابَرْت وْ مَا بْكِيتْ
- وَ صْبَرتْ و مَا شْكِيتْ
- بْقَاتْ لِيّامْ
- تَضْرَبْ فِيّا ضْرِيبْ
- --
- رَضْعَتْني مَن بَزّولةَ غَارْزَة
- شْحَالْ مَنْ هْمُومْ هَازّة
- مَا تْشَبّعْ كَرْش مَا تَرْوِي عْطَشْ
- غِيرْ مَيْص بْلا فْرَارَة
- فْ صُورَة حْلِيبْ
- --
- زَاوَكَتْ فَ شْيُوخِي
- وْ ضُمّانِي...
- وْ ذُوكْ لْعَايْشِينْ فَ زْمَانِي
- وَ حْتَى فَ الّلي مَانْوِيتْ
- رْجَايَا فِيهُمْ يْخِيبْ
- --
- مَا لْكَيتْ وْذَنْ تَسْمَعْ كْلامِي
- وَ بْقِيتْ سَارْحَة لْمَكْتَابْ
- وَاقْفَة فَ وْجَه ايّامِي
- نَتْسَنّاهَا تْحَنْ وْ تَرْطَابْ
- عَارَكْتهَا هَرْسَتْ حْسَامِي
- غَلْبَتْنِي ... قَتْلَتْنِي
- وْ كَفْنَتْنِي بَ كْفَنْ غْرِيبْ
- --------------
- فاطمة المسعودي 14/10/2017
شاعرة
الثلاثاء، 17 أكتوبر 2017
مجلة حديث الهيل الادبية /////حَمْلتْ بِي لِيّام بقلم الشاعرة فاطمة المسعودي
الاشتراك في:
تعليقات الرسالة (Atom)
ليست هناك تعليقات:
إرسال تعليق