- *٭ تسنيت من هاذي شحال٭*
- زجل مغربي
- مولاة الحسن و الدلال
- جاتني تضوي ك هلال
- نورها باهي بلا خيال
- من نظرة بان هبالي
- لابسة قفطان بتخمال
- و الساق بحناني كحال
- شربيل صقلي و خلخال
- مجدول خصرها يشالي
- لون شعرها جا غزال
- حرير و ذهبي ك كبال
- تمشي بْمْهَل ك غلال
- غواتني و زاد خبالي
- ما لقيت كلام و لا قوال
- و اللسان في فمي ثقال
- تعطلت و صابني خلال
- و ما لقيت حل لحالي
- حتّا من كلامي ذبال
- و الحرف ما بقى سهال
- كأنو مشدود ب غلال
- و أنا معاه اللالي
- تَّغْلَبْت و جهدي قلال
- و فكرت ف هروبي بدال
- قلت للرجال ماهي خصال
- ارى نواجه بفعالي
- قربت و قلت يا جمال
- يا قمر ف ليلة كمال
- بغيتة زوجة في حلال
- واش تقبلي سؤالي
- قالت يا طالب لوصال
- تسنيت من هاذي شحال
- كلمة منك في مرسال
- توصل و تريَّح بالي
- قلت يا زينة لخصال
- فقري اللي بعَّدني ميال
- ما نكسب ناقة و لا جمال
- و ضاعت كل موالي
- قالت ما يهمني شكال
- نعيش بحنديرة سمال
- نتا شمسي و نتا ظلال
- نحبك مجدوب بوهالي
- طيف الحب جال و صال
- و بعد سنين جاونا طفال
- و ضو السعد علينا شعال
- و عشنا أسعد ليالي
- يزيد علوي اسماعيلي
شاعرة
الخميس، 15 فبراير 2018
*٭ تسنيت من هاذي شحال٭* زجل مغربي**بقلم يزيد علوي اسماعيلي
الاشتراك في:
تعليقات الرسالة (Atom)
ليست هناك تعليقات:
إرسال تعليق